Nationalen Aktiounsplang fir d'Bekämpfung vun genderbaséierter Gewalt
Du bass net eleng: Hëllef existéiert.
Dëse Slogan däerf net nëmmen eng eidel Phrase bleiwen. Fir datt e Sënn mécht, mussen mir de Kampf géint an d'Präventioun vun allen Zorte vun genderbaséierter Gewalt zu enger nationaler Prioritéit maachen. E gemeinsamen Effort ass wesentlech, fir dës Gewalt an de Grëff ze kréien, déi leider nach ëmmer eng deeglech Realitéit fir vill Fraen, Männer, Teenager a Kanner ass.
An dësen turbulenten Zäiten, wou ëmmer méi vun eise gemeinsame Wäerter – wéi Geschlechtergläichheet, sozialen Zesummenhalt, Gewaltlosegkeet an d‘Diversitéit vun eise Gesellschaften – stänneg a Fro gestallt ginn, ass d'Zil vum Ministère, en Dispositif opzebauen, deen informéiert a sensibiliséiert, schützt an ënnerstëtzt, strofrechtlech verfollegt a sanktionéiert. Kuerz gesot ass d'Zil, e Reseau vun Hëllef opzebauen, deen de Bedierfnësser vun den Afferen vu Gewalt souwéi deenen entsprécht, déi hinnen hëllefen.
Et ass an dësem Kontext an zu dësem Zweck, datt de Ministère fir Gläichstellung an Diversitéit, a Kooperatioun mat sengen Regierungs- an operative Partneren an Organisatiounen aus der Zivilgesellschaft, den éischte nationalen Aktiounsplang géint geschlechterbaséiert Gewalt ausgeschafft huet. Baséierend op de véier Pilieren vun der Istanbul-Konventioun – Präventioun, Schutz, Verfollegung an integréiert Politiken – huet dëse Plang als Zil, op eng partizipativ Manéier all déi verschidden Akteuren, déi um Kampf géint Gewalt bedeelegt sinn, zesummen ze bréngen, fir eng gemeinsam Äntwert an e globalen Usaz fir d'Bekämpfung vun Gewalt zu Lëtzebuerg ze definéieren.
Am Kader vun dëse Pilieren proposéiert den Aktiounsplang aacht strategesch Moossnamen, déi sech op Formatioun, Sensibiliséierung, de gesetzleche Kader fir de Schutz vun den Affer, d'Responsabiliséierung vun de Täteren, d‘Ënnerstëtzung fir Affer an Täter, d’Erhiewung vun Daten, d'Gouvernance vun de Politiken. déi all d‘Forme vu Gewalt bekämpfen, an déi international Solidaritéit konzentréieren. 62 konkret Aktiounen wäerten d'Ëmsetzung vum Plang um Terrain sécherstellen.
D'Zil ass kloer: de nationalen Dispositif vun der Hëllef ze stäerken, sou datt mir all Affer vu geschlechterbaséierter Gewalt ënnerstëtze kënnen an hinnen eng gëeegent, adaptéiert a würdeg Hëllef ubidden. Dës Efforten mussen Hand an Hand goen mat eiser Investitioun an d'Präventioun, d'Informatioun an d‘Sensibiliséierung iwwert geschlechterbaséiert Gewalt – well Präventioun ass besser wéi Heelen.